Eu son MOITO EU cando...

Dende o Equipo de Dinamización da Lingua Galega do CPI de Mondariz, botamos a andar a comezos de outubro a campaña MOITOEU, coa que pretendiamos, primeiramente, que servise para comezar a funcionar como equipo coa comunidade educativa, en xeral, e co alumnado, en particular. 

Todo partiu da idea de crear unha camisola xigante do noso "equipo", mais como nos sobrou cartón... a segunda idea foi mellor ca a primeira. Confeccionamos un monigote, o MOITOEU, que tiña -e ten- un oco aberto na zona da faciana agardando pola cara de calquera membro da comunidade educativa. E coas nosas mans agarramos un bocadillo enorme para reafirmarnos no MOITOEU que somos cada un de nós ao falarmos galego. 

Cos obxectivos principais de favorecer as actitudes positivas cara á lingua galega e de mostrar o orgullosos que estamos dela, sacamos o MOITOEU ao recreo os días que non chovía e fixemos unhas fotos con el. Mirádeas aquí. 

Por outra banda, fomos gravando un vídeo coas mensaxes de todos os membros do CPI de Mondariz que quixeron participar referentes a como somos MOITOEU cando utilizamos o galego para usos cotiáns, académicos, familiares..., usos normais, vaia! Só nos levou uns segundos gravar o que quixemos dicir, pero o ben que o pasamos! Graciñas pola participación, polas risas, polo silencio para gravar... Presentámolo o día da final do concurso CONTRASINAL, do que tamén vos subiremos imaxes a modo de resumo en breve. Mirade o resultado da campaña MOITOEU!